बेथिति

मंगलसैनमा बदमासी रोक्न जडित सिसिटिभी क्यामेरा खरिदमै बदमासी

बिल एक पसलको, सामान अर्कै पसलको

धनराज साउँद ६ महिना अगाडि

जिल्लाको मंगलसैन नगरपालिकामा शान्ति सुरक्षा कायमसँगै अपराध नियन्त्रणका जडान गरिएका सिसिटिभी खरिदमै बदमासी भएको पाइएको छ ।

सदरमुकाम मंगलसैनको बजार क्षेत्र र ठुलासैनमा जडान गरिएका सिसिटिभी खरिदमै बदमासी भएको पाइएको हो ।

नगरपालिकामा जडान गरिएका सिसिटिभी क्यामेरा एक पसलबाट खरिद गरि अर्को पसलको बिल पेश गरि भुक्तानी भएको खुलेको छ ।

नगरपालिकाले दिएको सूचना अनुसार गत आर्थिक वर्षमा ९ लाख ९७ हजार ८ सय बराबरका सिसिटिभी क्यामेरा खरिद गरि मंगलसैन बजार क्षेत्र र ठुलासैन बजार क्षेत्रमा जडान गरिएका छन् ।

जडान गरिएको बर्ष दिन नबित्दै सिसिटिभी क्यामेराले काम गर्न छोडेपछि क्यामेराको गुणस्तरीयता र पारदर्शिताप्रति नगरपालिकाका केही अगुवाले गुनासो गरेका थिए ।

स्थानीयको गुनासोका आधारमा क्यामेराको गुणस्तरीयता र खरिद प्रक्रियाबारे माग गरिएको सूचनाका आधारमा नगरपालिकाले सूचना उपलब्ध गराएसँगै सिसिटिभी क्यामेरा खरिदमा बदमासी भएको खुलेको हो ।

नगरपालिकाले दिएको सूचना अनुसार खरिद गरिएका १० थान सिसिटिभी क्यामेरामध्ये आयुष ट्रेडर्स मंगलसैनबाट ४ लाख ९८ हजार ९ सय ५० र न्यु स्टार अर्डर एण्ड सप्लायर्सबाट ४ लाख ९८ हजार ८ सय ५० बराबरका क्यामेरा र सामाग्री खरिद गरिएका छन् ।

तर न्यु स्टार अर्डर एण्ड सप्लायर्सले आफूले नगरपालिकाको क्यामेरा सम्बन्धी कुनै पनि काम नगरेको बताएको छ ।

स्रोतका अनुसार नगरपालिकाका कर्मचारी र केही व्यापारीको मिलेमतोमा न्यु स्टार अर्डर एण्ड सप्लायर्सको बिल मात्रै पेश गरि क्यामेरा जडानको भुक्तानी दिइएको छ ।

करिब १० लाख लागतमा सिसिटिभी क्यामेरा जडान गरिएको नगरपालिकाले दाबी गर्दै आएको भए पनि कमसल खालका सस्तो मूल्यका सिसिटिभी क्यामेरा खरिद गरि मिलेमतोमा मोटो रकम भुक्तानी गरिएको स्रोतको दाबी छ ।

जडान गरिएका क्यामेराहरू बर्ष दिन नपुग्दै बिग्रिएका छन् । यश मामिलाका जानकारहरूका अनुसार विद्युतीय उपकरण खरिद गर्दा कम्तीमा पनि २ वर्षसम्म मर्मत सम्भारको काम दोस्रो पक्षले गर्नुपर्ने हुन्छ ।

तर सिसिटिभी क्यामेरा सम्बन्धी गुनासो बढेसँगै नगरपालिकाले सिसिटिभी क्यामेरा मर्मतका लागि प्रस्ताव आह्वान गरेको छ ।