धनगढी: कैलालीमा स्कुल बसको ठक्करबाट एक बालकको मृत्यु भएको छ।
घोडघोडी नगरपालिका–२ अन्तर्गत घोडाघोडी नगर अस्पताल नजिकको भित्री सडकमा भएको दुर्घटनामा ८ वर्षीय गोविन्द बिष्टको ज्यान गएको हो।
प्रहरीका अनुसार गोबिन्द बौनियास्थित सनराइज बोर्डिङ स्कुलमा कक्षा १ मा अध्ययनरत थिए। विद्यालयबाट बिदा भएपछि स्कुल बसमार्फत घर आइरहेका बालकलाई बसबाट झार्ने क्रममा सोही विद्यालयको मप्र०३–००१ क २९४१ नम्बरको बसले ठक्कर दिएको थियो।
साडेपानीका ५७ वर्षीय भागीराम चौधरीले चलाएको बसको ठक्करबाट बालकको घटनास्थलमै मृत्यु भएको जिल्ला प्रहरी कार्यालय कैलालीले जनाएको छ।
दुर्घटनापछि बस र बस चालकलाई प्रहरीले नियन्त्रणमा लिएको छ भने घटनाको कारणबारे थप अनुसन्धान भइरहेको प्रहरीले जानकारी दिएको छ।
क्याटेगोरी : समाचार, सुदूरपश्चिम
प्रतिक्रिया