महर–सिंह गुटबन्दीले बझाङमा एमाले प्रतिनिधि छनोट विवादित, दुई थरी सूची सार्वजनिक

पश्चिम रैवार १ मिनेट अगाडि

बझाङ : नेकपा एमालेको ११औं महाधिवेशन प्रतिनिधि छनोट प्रक्रिया बझाङमा विवादमा फसेको छ। सर्वसम्मत प्रतिनिधि चयन गर्न नसकेपछि दुई अलग–अलग गुटले आफ्ना सूची सार्वजनिक गरेका छन्।

एमालेको एउटा गुटले जिल्ला अध्यक्ष दिलबहादुर भण्डारी, संविधानसभा सदस्य लालबहादुर रावल, प्रदेशसभा सदस्य दमन भण्डारीसहित ११ जनालाई महाधिवेशन प्रतिनिधि चयन गरेको घोषणा गरे।

तर, अर्को गुटले थलारा गाउँपालिका अध्यक्ष प्रकाश रोकाया, केदारस्यूँ गाउँपालिकाकी पूर्व उपाध्यक्ष निशा धामीसहितको छुट्टै सूची सार्वजनिक गरेको छ।

पहिलो सूचीमा प्रमुख निर्वाचन अधिकृत राजेन्द्रप्रशाद जोशीको दस्तखत छ भने दोस्रो सूचीमा लेटरहेड नहुँदा पनि सोही अधिकृतको नाम समावेश गरिएको दावी गरिएको छ। दोस्रो सूचीमा रहेका प्रतिनिधि सिफारिसमा केन्द्रीय सदस्य भैरवबहादुर सिंह, अफिलाल ओखेडा र आशा विकको समेत हस्ताक्षर रहेको छ।

केन्द्रीय सदस्य अफिलाल ओखेडाले भने, ‘सबै क्षेत्र, भूगोल, मनोभावना मिलाएर जान खोज्दा एकलौटी गर्न खोजिएपछि दुईवटा सूची सिफारिस भएको हो। निर्वाचन प्रक्रिया नपु¥याइ, उम्मेदवारले फिर्ता नदिँदा हामीले पनि अर्को सूची ल्याएका हौं। अब प्रदेश र केन्द्रले निर्णय गर्छ।’

२०७९ सालको प्रतिनिधि सभा निर्वाचनपछिका समयदेखि देखिएको केन्द्रीय सदस्य ऐन महर र भैरवबहादुर सिंहबीचको गुटबन्दी बझाङ एमालेमा अझ गहिरो भएको छ।

महर पक्षका जिल्ला अध्यक्ष दिलबहादुर भण्डारीले भने, ‘निर्वाचन कमिटीले सम्पूर्ण प्रक्रिया पु¥याएर प्रतिनिधि चयन गरेको सूची नै आधिकारिक हो। अर्को सूची आए पनि त्यो मान्य हुँदैन।’

उनले थपे, ‘सबै निर्णय जिल्ला कमिटी र सचिवालयको बैठकबाट अनुमोदन भइसकेको छ। मलाई थाहा छैन अर्को सूची कसरी आएको हो। सबै केन्द्रीय कमिटी सदस्य र जिल्ला इन्चार्जको सहमतिमा प्रतिनिधि छनोट भएको हो।’