सुदूरपश्चिम घर भएका एमाले नेता थापालाई ओलीकै अगाडि दुर्व्यवहार

पश्चिम रैवार ५० सेकेन्ड अगाडि

धनगढी : नेकपा एमालेको एघारौँ महाधिवेशन नजिकिँदै गर्दा च्यासलस्थित केन्द्रीय कार्यालय आइतबार केही बेर तरंगित बन्यो।

महाधिवेशनको लोगो सार्वजनिक कार्यक्रम चलिरहेको बेलामा स्थायी कमिटी सदस्य कर्णबहादुर थापामाथि ‘धकेलाधकेल’ भएको दृश्यले सबैको ध्यान तान्यो। अध्यक्ष केपी शर्मा ओली, वरिष्ठ उपाध्यक्ष ईश्वर पोखरेललगायत शीर्ष नेताको उपस्थिति रहेको कार्यक्रममा थापा पनि सहभागी हुन पुगेका थिए।

ओली भवनतर्फ उक्लिरहेको बेलामा थापालाई ‘जाऊँ’ भन्दै उनी आफैंले संकेत गरेका थिए। त्यही संकेतको आधारमा थापा पनि अघि बढे। यतिबेला ओलीसँगै हिँडिरहेको एक युवक—निलो ज्याकेट र चश्मा—अचानक थापाको बाटो छेक्दै धकेलिदिए। धक्का त्यति बलियो थियो कि थापा झन्डै असन्तुलित हुन पुगे।

तत्कालै थापाले प्रतिकार गरेपछि युवक अझ आक्रामक बन्दै ‘स्कर्टिङ’ शैलीमा धम्क्याइरहेको दृश्य देखियो। थापाले यसलाई सामान्य नै मान्नुपर्ने बताए। तर उनले महाधिवेशनको संवेदनशील वातावरणमा यस्तो व्यवहारले ‘अर्को अर्थ’ लाग्ने सम्भावना रहेको उल्लेख गरे।

‘घटना ठूलो होइन। तर महाधिवेशनको माहोलमा अध्यक्षले नै बोलाएको ठाउँमा कार्यालयकै मान्छेले रोक्ने, धकेल्ने काम गर्‍यो,’ थापाले भने, ‘मैले तत्कालै प्रतिकार गरेको हुँ।’

एमालेभित्र बढ्दो तातोपनबीच च्यासलमा देखिएको यो क्षणिक झडपले पार्टीभित्रको आन्तरिक मनोविज्ञान फेरि सतहमा ल्याइदिएको छ।