एमाले कञ्चनपुरमा कोको भए प्रतिनिधि छनोट ?

पश्चिम रैवार १३ सेकेन्ड अगाडि

धनगढी : नेकपा एमालेको एघारौँ महाधिवेशनका लागि कञ्चनपुरका तीन वटै निर्वाचन क्षेत्रबाट कतै सर्वसम्मत रुपमा प्रतिनिधि छनोट गरिएको छ भने कही निर्वाचन गरेर प्रतिनिधि छनोट गरिएका छन्।

कुनैमा सर्वसम्मत रुपमा प्रतिनिधि छनोट गरिएको छ भने केही क्षेत्रमा निर्वाचन गरेर छनोट गरिएको नेकपा एमालेका जिल्ला उपाध्यक्ष तथा प्रचार विभाग प्रमुख जनकराज अवस्थीले बताए।

उहाँका अनुसार, कञ्चनपुर निर्वाचन क्षेत्र नम्बर १ बाट खुला सदस्यतर्फ ४९८ मतसहित पल्लबराज भट्ट र ६३९ मतसहित वीरबहादुर थापा निर्वाचित हुनुभएको छ । यसैगरी, महिलातर्फ कमला चौधरी ५१७ मत र कल्पना गिरी ५१४ मतसहित निर्वाचित भएका छन्।

साथै, युवा तर्फबाट काशीराम बोहरा ५२१ मतसहित महाधिवेशन प्रतिनिधिका लागि छनोट भएका छन्।

शनिबार भएको मतदानमा निर्वाचन क्षेत्र नम्बर एकबाट एक हजार ६० मत खसेको थियो।

यसैगरी, निर्वाचन क्षेत्र नम्बर दुईमा भने पाँच जना महाधिवेशन प्रतिनिधि सर्वसम्मत रुपमा छनोट गरिएको थियो।

जहाँ खुला सदस्यका लागि रणबहादुर महरा र वचनबहादुर सिंह सर्वसम्मत छनोट भएका हुन्।

महिलातर्फ लक्ष्मी बुढा र पार्वती जोशी सर्वसम्मत चयन भएका थिए भने युवा तर्फबाट पनि प्रविन बोगटी चयन भए।

यसैगरी, निर्वाचन क्षेत्र नम्बर ३ बाट खुला सदस्यतर्फ डा. दीपक प्रकाश भट्ट ५६७ मत र जनकराज अवस्थी ३३७ मतसहित निर्वाचित भए।

खुला सदस्यका लागि चार जनाको उम्मेदवारी परेको थियो। जसमध्ये महेश राज पन्तले ३०७ मत र विष्णु कणेँलले २९५ मत प्राप्त गरेेका थिए।

यसैगरी, दलित तर्फबाट प्रतिनिधि छनोटका लागि चार जनाबिच भएको प्रतिस्पर्धामा आरपी सार्की १७२ मत सहित निर्वाचित भए।

यसैगरी, युवा तर्फ ३५१ मतसहित ओम बस्नेत निर्वाचित भए। तीन उम्मेदवारबिच भएको प्रतिस्पर्धामा नरेन्द्र कार्कीले २५८ र केशव चन्दले १६४ मत प्राप्त गरे।

प्रतिनिधि छनोटका लागि मङ्सिर ११ गते मनोनयन दर्ता गरिएको थियो। नेकपा एमालेले काठमाडौँमा यही मङ्सिर २७ देखि २९ गते सम्म पार्टीको ११ औँ महाधिवेशन आयोजना गरेको छ।