अपराजित रहदै सुदूरपश्चिम पुग्यो प्लेअफ

पश्चिम रैवार १० सेकेन्ड अगाडि

काठमाडौं: सुदूरपश्चिम रोयल्स नेपाल प्रिमियर लिग एनपीएलको दोस्रो संस्करणको प्लेअफमा पुग्ने पहिलो टोली बनेको छ । शनिबार साविक विजेता जनकपुर बोल्ट्सलाई हराउँदै सुदूरपश्चिमले पाँच खेलमा शत प्रतिशत जित दर्ता गर्‍यो ।

यससँगै सुदूरपश्चिम लिग चरणका दुई खेल खेल्नुअघि नै प्लेअफ पुगेको हो ।

शनिबार कीर्तिपुरस्थित त्रिवि अन्तर्राष्ट्रिय क्रिकेट रङ्गशालामा जनकपुरले दिएको १४६ रनको लक्ष्य सुदूरपश्चिमले खेल सकिनु १४ बल अघि नै चार विकेटको क्षतिमा भेट्टायो ।

सुदूरपश्चिमका लागि इशान पाण्डेले सर्वाधिक ५६ रन बनाए । ३५ बलको सामना गरेका उनले ८ चौका र एक छक्का प्रहार गरे । त्यसैगरी, विकेटकिपर ब्याटर विनोद भण्डारीले ४९ बलमा ४२ रन जोडे ।

यस क्रममा उनले तीन चौका र एक छक्का प्रहार गरे । जनकपुरका माज शदाकतले दुई विकेट लिए । त्यसैगरी, सञ्जय कृष्णमुर्ती र आदित्य महताले समान एक विकेट लिए ।

त्यसअघि टस जितेर जनकपुरले पहिलो ब्याटिङ गरेको थियो । निर्धारित २० ओभरमा आठ विकेट गुमाउँदै जनकपुरले १ सय ४५ रन बनायो । जनकपुरका लागि सञ्जय कृष्णमुर्तीले अर्धशतक प्रहार गरे ।

उनले ३८ बलको सामना गर्दै चार चौका र दुई छक्का प्रहार गरे । त्यसैगरी जनकपुरका यान निकोल लफ्टी इटनले ३३ बलमा ३९ रन जोडे । सदूरपश्चिमका अभिनाश बोहरा एक्लैले चार विकेट लिए ।

त्यसैगरी स्कट कुगलाइनले तीन र दीपेन्द्रसिंह ऐरीले एक विकेट लिए ।