‘१५ वाम घटक मिलाएर रेकर्ड बनायौँ, अब हाम्रो ध्यान एमालेतिर पनि केन्द्रित छ’

पश्चिम रैवार १७ घण्टा अगाडि

धनगढी : नेपाली कम्युनिस्ट पार्टीको संयोजक पुष्पकमल दाहाल ‘प्रचण्ड’ ले आफूहरू बृहत् वामपन्थी एकताको पक्षमा रहेको बताएका छन्।

सुदूरपश्चिम प्रदेशको धनगढीमा आयोजना गरेको एकता सन्देश सभामा प्रचण्डले १५ भन्दा बढी वाम घटक गोलबद्ध भएर नेपाली कम्युनिस्ट गठन भएको बताएका हुन्।

संयोजक तथा पूर्व प्रधानमन्त्री प्रचण्डले अहिलेको सरकारले तोकिएको मितिमा निर्वाचन गर्नुपर्ने बताएका छन्।

उनले देशको निकासका लागि निर्वाचनको बिकल्प नरहेको चर्चा गरे।

नेपाली कम्युनिस्ट पार्टीले सुरु गरेको प्रदेशस्तरीय सन्देश सभा अभियानको पहिलो कार्यक्रमलाई धनगढीमा आज सम्बोधन गर्दै उनले यस्तो बताएका हुन्।

एकता सन्देश सभाले सरकारलाई पनि निर्वाचन गर्न प्रोत्साहन र दबाब दुवै सिर्जना गर्ने र त्यसको सुरुवात आफूहरुले गरेको उनको भनाइ छ।

उनले १५ वटा वाम घटकलाई एक ठाउँमा ल्याएर आफूहरूले रेकर्ड नै बनाएको जिकिर गरे।

उनले भने, ‘हाम्रो ध्यान एमालेतिर पनि छ, एमालेभित्रका सबै वामपन्थी, देशभक्त र क्रान्तिकारीहरू पनि यही पार्टीमा नै केन्द्रित हुनुपर्छ भन्ने जोड छ। सबैलाई अट्न सक्ने भएकाले नेपाली कम्युनिस्ट पार्टी राखेका हौँ। यहाँ अब कोही माओवादी छैन, अब कोही एकीकृत समाजवादी छैन।’

उनले एमालेभित्र रहेका क्रान्तिकारीहरूलाई पनि गहिरो गरी सोच्न आग्रह गरे।