सुदूरपश्चिमको लगातार दोस्रो जित, फेरि हार्‍यो पोखरा

पश्चिम रैवार ८ घण्टा अगाडि

काठमाडौं : नेपाल प्रिमियर लिग (एनपीएल) सिजन २ अन्तर्गत शुक्रबारको खेलमा सुदूरपश्चिम रोयल्सविरुद्ध फितलो बलिङ प्रस्तुत गर्दा कुशल भुर्तेलको कप्तानीमा रहेको पोखरा एभेन्जर्सले यस सिजनमा लगातार दोस्रो हार बेहोरेको छ । यससँगै पोखरा दुई खेलमा दुई हारको अवस्थामा पुगेको छ ।

यसअघिको खेलमा विराटनगर किङ्ससँग पोखरा ५३ रनले पराजित भएको थियो । सुदूरपश्चिम रोयल्सले भने पोखरालाई हराउँदै दुई खेलमा शत प्रतिशत जित निकालेको छ । यस सिजनको आफ्नो पहिलो खेलमा सुदूरपश्चिमले काठमाडौं गुर्खाजविरुद्ध २९ रनको जित हासिल गरेको थियो ।

शुक्रबार पोखराविरुद्धको खेलमा सुदूरपश्चिम रोयल्स १८ रनले विजयी भएको हो । टस हारेर पहिले ब्याटिङ गरेको सुदूरपश्चिमले दिएको १ सय ९४ रनको लक्ष्य पछ्याउँदै जवाफी ब्याटिङमा उत्रिएको पोखराले निर्धारित २० ओभरमा ८ विकेटका क्षतिमा १७५ रन बनायो । आजको खेलमा पोखराको बलिङ र ब्याटिङ दुवै फितलो रह्यो ।

सुरुवातमा पोखराका बलर नचल्दा सुदूरपश्चिमले ब्याटिङ उकासेको थियो । सुदूरपश्चिमका ओपनरद्वय जोश ब्राउन र विनोद भण्डारीले १०८ रनको साझेदारी गरे । १० ओभरको चौथो बलमा पुगेर पोखराले पहिलो विकेटको रुपमा ब्राउनलाई आउट गर्‍यो । ब्राउनले ३५ बलमा ६ चौका र ५ चौकाको सहयोगमा ६८ रन जोडे ।

उनी नै सुदूरपश्चिमबाट सर्वाधिक रन बनाउने खेलाडी हुन् । अर्का ओपनर विनोदले ४२ बलमा ६ चौकाको सहयोगमा ४३ रन जोडे । उनी टिमको दोस्रो सर्वाधिक रन बनाउने बने । पहिलो विकेट गुमेपछि क्रिजमा आएका क्रिश लिनले पनि १३ बलमा ३१ रन जोडे । पोखरा सुरुवाती बलिङ फितालो देखिएको थियो ।

१३ ओभरपछि पोखराले बलिङमा लय समातेको थियो । तर, त्यसबेलासम्म सुदूरपश्चिम २ विकेटको क्षतिमा १४२ रनको मजबुत अवस्थामा पुगेको थियो । डान डाउथवेटबाहेक अरु बलिङमा किफायती बन्न सकेनन् । डानले भने ४ ओभर बलिङ गर्दा २४ रन खर्चेर हरमित सिंह र दीपेन्द्र सिंह ऐरी जस्ता महत्वपूर्ण खेलाडीको विकेट लिए ।

जेम्स निशमले दुई महत्वपूर्णसहित तीन विकेट लिए पनि धेरै रन खर्चिए । चार ओभर बलिङ गर्दा उनले ४७ रन खर्चिए । उनी नै पोखराका सबैभन्दा बढी रन खर्चिने खेलाडी बन्न पुगे । निशमले सुदूरपश्चिमका सर्वाधिक रन बनाउने जोश ब्राउन र पहिलो विकेट गएपछि क्रिजमा आएका क्रिस लिनलाई आउट गराए ।

सर्वाधिक दोस्रो रन बनाउने ओपनरसमेत रहेका विनोद भण्डारीलाई आकाश चन्दले आउट गराए । चार ओभर बलिङ गर्दा उनले ४४ रन खर्चिए । विपिन खत्रीको बलिङ आजको खेलमा चलेन । तीन ओभर बलिङ गर्दा उनले विकेटविहीन हुँदै २३ रन खर्चिए । सागर ढकाल पनि विकेटविहीन रहे । उनले चार ओभरमा ४१ रन खर्चिए ।

जवाफी ब्याटिङमा उत्रिएको पोखराका दुई ब्याटरको प्रस्तुती सुखद रह्यो । तथापि ब्याटिङ पनि फितलो नै मान्न सकिन्छ । ओपनरद्वय दिनेश खरेल र एडम रोसिंगटनले दोहोरो रन बनाउन सकेनन् । यीसहित ६ खेलाडीले दोहोरो रन बनाउन सकेनन् । कप्तान कुशल भुर्तेल र जेम्स निशमले पोखराको ब्याटिङ उकासे पनि जितका लागि पर्याप्त भएन ।

भुर्तेलले अर्धशतक पूरा गर्दै ३२ बलमा चार चौका र चार छक्काको सहयोगमा ५३ रन जोडे । निशमले २५ बलमा पाँच छक्का र २ चौकाको सहयोगमा ४७ रन जोडे । महत्वपूर्ण विकेट गुमेपछि क्रिजमा गएका अलराउन्डर डान डाउथवेटको पोखरालाई जिताउने प्रयास असफल रह्यो । उनले १६ बलमा १ चौका र ५ छक्काको सहयोगमा २७ रन जोडे ।