डडेल्धुरामा गर्भपतन गराउने किशोरीमा चुनौती कायमै

पश्चिम रैवार २ हप्ता अगाडि

डडेल्धुरा: सुरक्षित गर्भपतन सेवा लिने महिलामध्ये २० वर्षमुनिका किशोरीको चुनौती कायमै रहेको छ। सुरक्षित गर्भपतन गराउनेमा २० मुनिका किशोरीको सङ्ख्यामा बर्सेनि चुनौती थपिँदै गएको हो।

स्वास्थ्य कार्यालय डडेलधुराको तथ्याङ्क अनुसार आर्थिक वर्ष २०८०/८१ मा जम्मा एक हजार १९ महिलाले सुरक्षित गर्भपतन सेवा लिएका छन्। यो सङ्ख्यामध्ये ५६ जना २० वर्षमुनिका किशोरी थिए।

उनीहरुले जिल्लाका सुरक्षित गर्भपतन गरिने विभिन्न स्वास्थ्य संस्थाबाट सुरक्षित गर्भपत सेवा लिएको स्वास्थ्य कार्यालय प्रमुख केशर साउदले बताए।

उनका अनुसार आव २०८१र८२ मा एक हजार ६२ महिलाले सुरक्षित गर्भपतन सेवा लिएका छन्।

यो सङ्ख्यामध्ये ३२ जना २० वर्षमुनिका किशोरी रहेका छन्। स्वास्थ्य कार्यालय डडेलधुराका आमा सुरक्षा कार्यक्रम प्रमुख आशा थापाले महिलाले २० वर्षमुनि गर्भपतन गराउनु स्वास्थ्यका दृष्टिले जोखिममा रहने बताए।

२० वर्षमुनि आफ्नै शरीर शारीरिक तथा मानसिक रूपमा परिपक्क नभएको अवस्थामा थुप्रै समस्या आउन सक्ने सम्भावना बढी हुन्छ। यसको रोकथामका लागि थुपै जनचेतनामूलक कार्यक्रम गर्दै आएकोमा रोकथाम तथा नियन्त्रण गर्न चुनौती रहेको उनले बताए।

कार्यालय प्रमुख साउदका अनुसार सरकारले व्यवस्थापन गर्न नसक्दा समस्या चुनौतीका रूपमा खडा भएको छ । अस्थायी साधनकोसमेत अभाव हुँदा समस्या भएको उनको भनाइ छ। परिवार नियोजनको अस्थायी साधन आइयुसिडी सेवासमेत अहिले दिन सकिने अवस्था नरहेको कार्यालय प्रमुख साउदले बताए।

यहाँको समुदायमा २० वर्ष नहुँदै विवाह हुने भएका कारण पनि २० वर्षमुनिका किशोरीले गर्भपतन गराउँदा चुनौती थपिएको छ। जिल्लाभर २६ वटा स्वास्थ्य संस्थाबाट सुरक्षित गर्भपतन सेवा प्रवाह भइरहेका छन्। यसैबाट नै पुष्टि हुन्छ कि गर्भवती गर्भपतनको चुनौती कस्तो छ।