बैतडीको शिवनाथ मेलाबाट फर्किएको जिप दुर्घटना हुँदा एक जनाको मृत्यु, चार घाइते

पश्चिम रैवार २ मिनेट अगाडि

बैतडी– बैतडीको शिवनाथ धाममा लागेको मेलाबाट फर्किने क्रममा जिप दुर्घटना हुँदा एक जनाको मृत्यु भएको छ, भने ४ जना घाइते भएका छन् ।

गयराती से १ ज ७३२ नम्बरको बालेरो जीप मेलौली नगरपालिका– ७ स्वाखानीमा दुर्घटना भएको प्रहरीले जनाएको छ ।

सो दुर्घटनामा मेलौली नगरपालिका– २ दुर्गास्थान स्वाडीकी २४ वर्षीया तुलसी पाण्डेयको मृत्यु भएको जिल्ला प्रहरी कार्यालय, बैतडीका इन्सपेक्टर बल्देब बडुले बताए ।

उनको उपचारका क्रममा प्राथमिक स्वास्थ्य केन्द्र मेलौलीमा मृत्यु भएको हो ।

घाइते हुनेमा जीप चालक दरशथचन्द नगरपालिका– ७ सुर्कालका ३२ वर्षीय जनकराज बडु, मेलौली नगरपालिका– २ का ६५ वर्षीय डम्बर पाण्डेय, उनका दुई छोरा ३४ वर्षीय हरि पाण्डेय र २८ वर्षीय ओमप्रकास पाण्डेय रहेका छन् ।

जीप चालक बाहेक मृतक र घाइते सबै एकै परिवारका रहेको इन्सपेक्टर बडुले बताए ।

घाइते गाडी चालक जनकराज बडु बाहेक अन्य तीन जनाको अवस्था सामान्य रहेको बुझिएको छ । चालक बडुको टाउकोमा चोट छ । घाइते सबैलाई डडेल्धुरा अस्पताल पठाइएको छ ।

जीप सडकबाट करिब १० मिटर तल खसेको इन्सपेक्टर बडुले बताए ।

दुर्घटनाको कारण भने खुलेको छैन घटना सम्बन्धि थप अनुसन्धान भइरहेको प्रहरीले जनाएको छ ।