हाकिमविहीन मंगलसैन : प्रशासनिक कामकाज ठप्प, सेवाग्राही मारमा

साेडारीकाे जिम्मेवारी खाेसियाे : अन्य कर्मचारी छैनन् जिम्मेवारी लिन तयार

धनराज साउँद ३ महिना अगाडि

अछाम। प्रमुख प्रशासकीय अधिकृतविहीन बनेपछि अछामको मंगलसैन नगरपालिकाको प्रशासनिक कामकाज ठप्प भएको छ। सेवाग्राहीहरू आवश्यक सेवा नपाउँदा मर्कामा परेका छन्।

नगरपालिकामा निमित्त प्रमुख प्रशासकीय अधिकृतका रूपमा कार्यरत खकेन्द्र बहादुर सोडारीको जिम्मेवारी खोसिएपछि कार्यालय नेतृत्वविहीन बनेको हो । संघीय मामिला तथा सामान्य प्रशासन मन्त्रालयले माघ ९ गतेदेखि लागू हुने गरी सोडारीलाई जिम्मेवारीबाट हटाएको थियो ।

सोडारीले सम्हाल्दै आएको आर्थिक तथा प्रशासनिक कामकाजसहित निमित्त प्रमुख प्रशासकीय अधिकृतको जिम्मेवारी रद्द गरिएको पत्राचार भएपछि मंगलसैन नगरपालिकामा नेतृत्व सङ्कट उत्पन्न भएको हो ।

प्रशासकीय नेतृत्व नहुँदा कार्यालयका भुक्तानी, सम्झौता, सिफारिस लगायतका कार्य ठप्प छन् । सूचना अधिकारी विष्णु जैशीका अनुसार सेवाग्राही दैनिक सेवा लिन नगरपालिकामा आउँछन्, तर कुनै पनि काम अघि नबढ्दा निराश हुँदै फर्कन बाध्य छन्।

मन्त्रालयको निर्णयप्रति नगर सरकार आक्रोशित

नगरपालिकाका मेयर पदम बहादुर बोहरा मन्त्रालयको निर्णयप्रति आक्रोशित छन् । उनका अनुसार नगरपालिकामा कार्यरत ज्येष्ठ कर्मचारीहरूले निमित्तको जिम्मेवारी लिन अस्वीकार गरिसकेको अवस्थामा जिम्मेवारी सम्हाल्दै आएका सोडारीलाई हटाएर विकल्प उपलब्ध नगराउनु गैर–जिम्मेवारपूर्ण कार्य हो।

मेयर बोहराले मन्त्रालयलाई ७२ घण्टाभित्र रिक्त पदमा नेपाल प्रशासन सेवा, सामान्य प्रशासन समूह, राजपत्राङ्कित द्वितीय श्रेणीको प्रमुख प्रशासकीय अधिकृत खटाउन पत्राचार गरिसकेका छन्। तर दुई हप्ता बितिसक्दा पनि मन्त्रालयबाट कुनै सुनुवाइ भएको छैन ।

निजामती सेवा नियमावली २०५० को नियम ४६ अनुसार, स्थानीय तहमा कार्यरत ज्येष्ठ कर्मचारीलाई मात्र निमित्त प्रमुख प्रशासकीय अधिकृतको जिम्मेवारी दिन सकिन्छ। तर मन्त्रालयले कनिष्ठ रहेका सोडारीलाई हटाए पनि नयाँ निमित्त तोकिएको छैन।

नगरमा कार्यरत अन्य ज्येष्ठ कर्मचारीले जिम्मेवारी लिन अस्वीकार गरेको अवस्थामा मन्त्रालयले कामकाजी हाकिमको जिम्मेवारी खोसेर दरवन्दी अनुसारका कर्मचारी नखटाउँदा झन् समस्या निम्तिएको छ । नगरपालिकाका स्रोतहरूका अनुसार ज्येष्ठ कर्मचारीहरूले जिम्मेवारी लिन अस्वीकार गरेका छन् । ज्येष्ठ कर्मचारीले कार्यपालिका बैठकको निर्णयसहितको सिफारिस पठाउन मन्त्रालयले भने पनि नगरपालिकाले हालसम्म कुनै निर्णय गर्न सकेको छैन।

प्रमुख प्रशासकीय अधिकृत नहुँदा विकास निर्माण, प्रशासनिक सेवा तथा आर्थिक कारोबार प्रभावित भएका छन्। स्थानीय सेवाग्राहीहरू आवश्यक सेवा नपाउँदा समस्यामा परेका छन्। मन्त्रालयले तत्काल दरवन्दी अनुसार कर्मचारी पठाउनु पर्ने वा त साविककै साेडारीलाइ पुन : जिम्मेवारी नदिएसम्म गलसैन नगरपालिकामा प्रशासनिक सङ्कट कायमै रहने देखिन्छ।

साेडारीसँगै उता चाैरपाटी गाउँपालिकाका निमित्त प्रमुख प्रशासकीय अधिकृत धन बहादुर थापाकाे जिम्मेवारी खाेसीएकाेमा उनले पुन: अख्तियारी पाइसकेका छन् ।

धनराज साउँद

साउँद रेडियो बान्नीगढीको कार्यकारी निर्देशकका साथै पश्चिम रैवारको प्रकाशक हुन् । उनले खोज अनुसन्धान तथा समसमायीक बिषयमा कलम चलाउँछन् ।