बाजुराबाट एमाले ११ औं महाधिवेशनका लागि प्रतिनिधि सर्वसम्मत चयन

पश्चिम रैवार २९ सेकेन्ड अगाडि

बाजुरा : नेपाल कम्युनिस्ट पार्टी (एमाले) बाजुराले पार्टीको ११ औं राष्ट्रिय महाधिवेशनका लागि प्रतिनिधि सर्वसम्मत रूपमा चयन गरेको छ।

मंसिर २७ देखि २९ गते काठमाडौंमा हुने महाधिवेशनका लागि खुला, महिला, दलित र युवा गरी १६ जना प्रतिनिधि सर्वसम्मत बनेका हुन्।

प्रतिनिधि छनोट निर्वाचन समिति संयोजक मदनराज जैशीका अनुसार खुलातर्फ ७ जना, महिलातर्फ ४ जना, दलित कोटाबाट ४ जना र युवा कोटाबाट एक जनाको नाम सर्वसम्मत तय गरिएको हो।

खुलातर्फ लालबहादुर ओली, जनक कुमार बोहरा, बल्देव रेग्मी, गगन रावल, भरत थापा, मनलाल विष्ट र मेघराज शाही छानिएका छन्। महिलातर्फ सीता थापा, देवु खाती, पार्वती थापा विष्ट र बसन्ती गुरुङ प्रतिनिधि बनेका छन्।

दलित कोटाबाट काशी विक, गौरी सार्की, अमर विक र राजकला सार्की चयन भएका छन्। ४० वर्षभन्दा कम उमेरको युवा कोटामा नरेश रोकाया सर्वसम्मत चयन भएका छन्।

रोकाया अनेरास्ववियूका अध्यक्ष भए पनि उमेर हदका कारण रोकिएका थिए।

एमाले बाजुराबाट १० औं महाधिवेशनका लागि पनि प्रतिनिधि सर्वसम्मत चयन भएका थिए भने नवौं महाधिवेशनमा भने चुनाव भएको थियो।