सुदूरपश्चिममा चुनावलक्षित सुरक्षा गोष्ठी हुने

पश्चिम रैवार १४ सेकेन्ड अगाडि

धनगढी : आगामी फागुन २१ गतेका लागि तोकिएको प्रतिनिधि सभा सदस्य निर्वाचनलक्षित सुदूरपश्चिम प्रदेशस्तरीय सुरक्षा गोष्ठी आयोजना हुने भएको छ । सुदूरपश्चिम प्रदेशका तर्फबाट सुरक्षा प्रतिवेदन पेस गर्ने प्रयोजनका लागि यही मङ्सिर १६ गते धनगढीमा प्रदेशस्तरीय सुरक्षा गोष्ठी हुने भएको हो ।

गोष्ठीमा सुदूरपश्चिम प्रदेशको समग्र शान्तिसुरक्षाको वस्तुगत अवस्था, समस्या तथा चुनौती, अपराध नियन्त्रण, सीमा सुरक्षाका विषयमा प्रतिवेदन पेस गरिने मुख्यमन्त्रीको सचिवालयले जानकारी दिएको छ । a

शुक्रबार मुख्यमन्त्री निवासमा बसेको प्रदेश सुरक्षा संयन्त्रको बैठकले गोष्ठीका लागि चार वटै सुरक्षा निकाय, प्रदेश निर्वाचन कार्यालयको सहभागितामा आन्तरिक मामिला तथा कानुन मन्त्रालयले संयोजन गरी प्रस्तुतीकरण तयार पार्ने निर्णय गरेको छ ।

मुख्यमन्त्री कमलबहादुर शाहको आतिथ्यतामा बसेको संयन्त्रको बैठकले गोष्ठीको समग्र व्यवस्थापनका लागि आन्तरिक मामिला तथा कानुन मन्त्रालय र जिल्ला प्रशासन कार्यालय कैलालीले एउटा टोली गठन गरी चुस्तदुरुस्त कार्य गर्ने निर्णय गरेको छ । आर्थिक व्यवस्थापन आन्तरिक मामिला तथा कानुन मन्त्रालय र बसोबास स्थान, सुरक्षा व्यवस्थापन जिल्ला प्रशासन कार्यालयले गर्ने बैठकले निर्णय गरेको छ ।

यसै गरी संयन्त्रको बैठकले प्रदेशको आपत्कालीन गोदामघरको व्यवस्थापन कानुनबमोजिम हुने गरी अनुगमन तथा निरीक्षण गर्ने निर्णय गरेको छ । त्यसका लागि चार वटै सुरक्षा निकायको सहभागितामा आन्तरिक मामिला तथा कानुन मन्त्रालयले यथाशीघ्र अनुगमन तथा निरीक्षण टोली गठन गरेर महिनामा एक पटक निरीक्षणको व्यवस्था मिलाउने बैठकले निर्णय गरेको छ ।

प्रादेशिक आपत्कालीन गोदामघरको सुरक्षा प्रबन्धका लागिमात्र आवश्यक जनशक्ति व्यवस्थापन गर्न प्रदेश प्रहरी कार्यालय धनगढीलाई सिफारिस गर्ने बैठकले निर्णय गरेको छ । आन्तरिक मामिला तथा कानुनमन्त्री हिरासिंह सार्कीको अध्यक्षतामा संयन्त्रको बैठक बसेको थियो ।