गौरा पर्वले आपसी प्रेम, सद्भावलाई प्रगाढ बनाउन भूमिका निर्वाह गरेको छ: प्रदेश प्रमुख मियाँ

पश्चिम रैवार ८ घण्टा अगाडि

धनगढी : सुदूरपश्चिम प्रदेशका प्रदेश प्रमुख नजीर मियाँले यस प्रदेशमा विशेष महत्वका साथ परापूर्वकालदेखि मनाउँदै आएको गौरा पर्वले आपसी प्रेम, सद्भावलाई प्रगाढ बनाउन महत्वपूर्ण भूमिका निर्वाह गरेको बताएका छन्।

गौरा पर्वको अवसरमा आज स्वदेश तथा विदेशमा रहेका सम्पूर्ण नेपालीहरुमा सुख, समृद्धि, उत्तरोत्तर प्रगति र सुस्वास्थ्य दीर्घायुको शुकामना दिँदै उनले यस्तो बताए।

प्रदेश प्रमुख मियाँले गौराले नेपालको मौलिक संस्कृति, परम्पराको संरक्षण, संवर्धन र विकासमा टेवा पुर्‍याउने कार्य गरिरहेको उल्लेख गरे।

हरेक वर्ष भाद्र शुक्लपञ्चमीदेखि अष्टमीसम्म मनाइने यो पर्वमा अष्टमीको दिन व्रत बसेर गौरा पर्व मनाउने स्थल गौरा खला (आँगन) मा पार्वती शिवको पूजापाठ गर्ने चलन रहेको उनको भनाइ छ।

प्रदेश प्रमुख मियाँले यस पर्वको अवसरमा स्थानीयहरुले देउडा, धमारी र ढुस्को खेल्दै रमाइलो गर्ने चलन रहेको बताए।

घर परिवारबाट टाढा रहेका आफन्तहरुसमेत पर्व मनाउन आफ्नो घर फर्किने भएकाले पारिवारिक मिलनमा पनि यो पर्वले विशेष महत्व राख्ने गरेको उनको भनाइ छ।

गौरा पर्वले सामाजिक सद्भावसहित सम्पूर्ण नेपालीहरुबिच भावनात्मक एकता र आपसी भाइचारा अभिवृद्धि गर्दै नयाँ उमङ्ग र हौसलाको साथ मुलुकको प्रगतिमा अग्रसर हुने प्रेरणा प्रदान गरोस् भन्ने अपेक्षासहित उहाँले शुभकामना व्यक्त गरे।