अछाममा छाउ बारेर त्रिपालमा सुतेकी महिलाको मृत्यु, साथमा रहेकी बालिका पनि अस्ताइन्

पश्चिम रैवार १ दिन अगाडि

अछाम : अछाममा महिनावारी भएको कारण त्रिपालमा बसिरहेकी एक युवती र एक बालिकाको ढुङ्गाले लागेर मत्यु भएको छ।

जिल्लाको पञ्चदेवल विनायक नगरपालिका–८ बरालामा ढुङ्गा खस्दा २८ वर्षीया निम खनाल र मङ्गलसेन नगरपालिका–६ की ७ वर्षीया कविता भण्डारीको ज्यान गएको अछामका प्रहरी प्रमुख डिएसपी ओमप्रकाश खनालले जानकारी दिए।

सोही घटनामा मङ्गलसेन–६ की रत्नकला भण्डारी घाइते भएकी छन्। उनको टाउकोमा गम्भीर चोट लागेकाले उपचारका लागि नेपालगञ्ज लैजाने तयारी भइरहेको प्रहरीले जनाएको छ।

गए राति स्थानीय चुरकुली भन्ने स्थानमा महिनावारी भएको कारण घरको आँगनमा त्रिपाल मुनि सुतेका उनीहरू माथिबाट ढुङ्गा खस्दा दुर्घटना भएको हो।

अछाममा हिजोदेखि लगातार वर्षा भइरहेकाले भिरालोबाट ढुङ्गा खस्ने जोखिम बढेको छ।

यसअघि छाउगोठ भत्काउने अभियानसँगै महिनावारी भएका महिलाहरू त्रिपाल वा ओडारमा बस्न थालेका छन्।