पार्टी संगठन बिस्तारमा लागी पर्न एमाले अध्यक्ष बोहराको निर्देशन

पश्चिम रैवार २ महिना अगाडि

नेकपा एमाले अछामका अध्यक्ष चन्द्र बोहराले पार्टी मोर्चा बलियो भए मात्रै संसदीय मोर्चा हासिल हुने भएकाले पार्टी मोर्चालाई बलियो बनाउनुको विकल्प नरहेको बताएका छन् ।

नेकपा एमाले बान्नीगढी जयगढ गाउँपालिका वडा नम्बर ४ तिमिल्सैनको दोस्रो वडा अधिवेशनमा प्रमुख अतिथिको रुपमा बोल्दै अध्यक्ष बोहराले पार्टी र संगठन बिस्तारमा विशेष ध्यान दिनुपर्ने बताएका हुन् ।

तिमिल्सैनमा गएको चुनावबाट नयाँ विरासत कायम गर्न सफल भएकोमा खुसी व्यक्त गर्दै विरासत जोगाइ राख्नुपर्नेमा उनले जोड दिए ।

निर्वाचनका क्रममा गरिएका प्रतिबद्धता र घोषणा अनुरूप पार्टीका जनप्रतिनिधि अघि बढ्नुपर्ने उनको भनाई छ ।

पार्टी र पार्टीका नेताहरू व्यक्ति केन्द्रित नभई ठाउँ र समाज केन्द्रित बन्नुपर्ने उनले सुझाव दिएका छन् ।

वडा कमिटी अध्यक्ष किरण खत्रीको अध्यक्षतामा सम्पन्न अधिवेशनबाट झंकर बोहराको अध्यक्षतामा नयाँ वडा संगठन कमिटी सर्वसम्मत रुपमा चयन गरिएको छ ।

जसको उपाध्यक्षमा सरिता ठकुल्ला सचिवमा वेदराज तिमिल्सिना, सह सचिवमा चन्द्रकला ठकुल्ला राजेन्द्र परियार लगायतका सदस्य रहेका छन् ।

कार्यक्रममा जिल्ला कमिटी सदस्य नवराज साउँद,डवल ठकुल्ला,भरत खड्का बिन्दु रावल लगायतका अतिथि रहेका थिए ।