बालकुमारीमा ज्यान गुमाएका शाहको परिवारलाई चौरपाटीको डेढ लाख सहयोग

धनराज साउँद ७ महिना अगाडि

अछामको चौरपाटी गाउँपालिकाले ललितपुरको बालकुमारी घटनामा मारिएका वीरेन्द्र शाहको परिवारलाई डेढ लाख रुपैयाँ प्रदान गरेको छ ।

गत शुक्रवार बालकुमारीमा भएको आन्दोलनका क्रममा ज्यान गुमाएका चौरपाटी गाउँपालिका वडा नम्बर १ का शाहको परिवारलाई राहत स्वरूप गाउँपालिकाले एक लाख ५० हजार रुपैयाँ दिने निर्णय गरेको थियो।

सोही अनुरूप आज गाउँपालिकाका अध्यक्ष भीम बहादुर साउँदले उनको परिवारलाई १ लाख ५० हजारको चेक हस्तान्तरण गरेका हुन् ।

गाउँकार्यपालिकाको यस अघिको आठौँ कार्यपालिका बैठकले शाहको निधनमा शोक प्रस्ताव पारित गर्दै मृतकको परिवारलाई एक लाख ५० हजार प्रदान गर्ने निर्णय गरेको थियो ।

गत शुक्रवार पानीजहाज बनाउने कामका लागि कोरिया भाषा परीक्षा दिएका, तर फेल भएका युवाहरूले पुनः भाषा परीक्षामा सहभागी हुन पाउनुपर्ने माग गर्दै ललितपुरको बालकुमारी क्षेत्रमा प्रदर्शन गर्ने क्रममा चौरपाटी १ का शाहको मृत्यु भएको थियो ।

त्यस क्रममा प्रहरीसँगको धरपकडमा अछामका वीरेन्द्र शाहसँगै दैलेखका सुजन रावतको मृत्यु भएको थियो ।

धनराज साउँद

साउँद रेडियो बान्नीगढीको कार्यकारी निर्देशकका साथै पश्चिम रैवारको प्रकाशक हुन् । उनले खोज अनुसन्धान तथा समसमायीक बिषयमा कलम चलाउँछन् ।

क्याटेगोरी : राजनीति, समाचार, सुदूरपश्चिम