कमलबजारमा भेटिए प्राचीन मुङ्ग्रा धारा : यसरी सुरु भयो उत्खनन (कुराकानी सहित)

धनराज साउँद १ वर्ष अगाडि

कमलबजार नगरपालिका वडा नम्बर ७ सेरामा प्राचीन मुङ्ग्राका धारा भेटिएका छन् । वडा नम्बर ७ सेराको कुलदेवमा प्राचीन मुङ्ग्राका धाराहरू भेटिएका हुन् ।

करिब ४० बर्ष पहिलेको भीषण पहिरोमा ऐतिहासिक धाराहरू पुरिएको स्थानीयको भनाइलाई ध्यानमा राखी वडा अध्यक्ष नृप बहादुर बोहरा र स्थानीयको पहलमा उत्खनन गर्दा तिँ कलात्मक धाराहरू भेटिएका हुन् ।

बषौँ पहिले पहिरोले पुरिएको उक्त स्थान पूर्ण रुपमा उत्खनन हुन बाँकी रहेको वडा अध्यक्ष नृप बहादुर बोहराको भनाई छ । उनका अनुसार हाल कलात्मक शैलीका २ वटा आकर्षक धारा देखिएका छन् भने उत्खननको कार्य जारि रहेको छ ।

उक्त स्थान पूर्ण रुपमा उत्खनन हुन बाँकी रहेकाले अन्य संरचनाहरू समेत फेला पर्न सक्ने आँकलन गरिएको छ । शताब्दी औँ अगाडी अछामी राजा देवचन्द्र समालको राज्यकालमा सेरामा अछामको राजधानी समेत रहेको स्थानीय जानकारहरू बताउँछन् ।

प्राचीन कालमा भोटे राजाले राज गरेको स्थान समेत सेरा रहेको र कुलदेवमा उनीहरूले निर्माण गरेको धाराहरू पहिरोले पुरिएको छन् भन्ने ज्येष्ठ नागरिकहरूको भनाइलाई ध्यानमा राखी वडा सरकारले बजेट विनियोजन गरि तिँ सम्पदा उत्खनन गर्ने कार्य अगाडी बढाइएको वडा अध्यक्ष बोहराको भनाइ छ ।

ढुंगालाई कुँदेर बुट्टा सहित मूर्तिको स्वरूप तयार गरि ढुंगाकै बिचमा पानी बग्ने गरि बनाइएका धाराहरू हेर्दा समेत आकर्षक र कलात्मक देखिन्छन् । तिँ धाराहरू कहिले र कसले निर्माण गरेका हुन भन्नेबारे कुनै पनि लिखित दस्ताबेज फेला भने फेला पार्न नसकिएको वडा अध्यक्ष बोहराले बताएका छन् ।