Hikmat Acharya
  • १० जेठ २०८१, बिहीबार
  • काठमाडौं
Paschim Raibar

वैदेशिक क्षेत्रका श्रमिक आजदेखि सामाजिक सुरक्षा कोषमा समेटिँदै


वैदेशिक रोजगारीमा रहेका तथा विदेशमा स्वरोजगारमा रहेका श्रमिक आजदेखि सामाजिक सुरक्षा योजनामा समेटिने भएका छन् ।

वैदेशिक रोजगारीमा रहेका श्रमिकलाईसमेत सामाजिक सुरक्षा कोषमा आबद्ध गर्दै योगदानमा आधारित सामाजिक सुरक्षाको दायरा बिस्तार गर्ने कामको आजदेखि सुरुवात गर्न लागिएको कोषका प्रवक्ता विवेक पन्थीले जानकारी दिनुभयो ।

योजना सुरु भएसँगै वैदेशिक रोजगारीमा रहेका झण्डै २२ लाख नेपाली श्रमिक लाभान्वित हुने अनुमान छ ।

आजदेखि नयाँ श्रम स्वीकृति लिनेलाई कोषमा सूचीकृत हुने व्यवस्था अनिवार्य गरिएको छ । श्रम स्वीकृति लिनेले कोषमा एक महिनाको योगदान रकम जम्मा गर्नुपर्नेछ ।

विदेशमा रहेका श्रमिकले कोषको वेवसाइटबाट सूचीकरण गरी योगदान रकम जम्मा गर्न सक्ने व्यवस्था गरेको उहाँले बताउनुभयो ।

वैदेशिक रोजगारीमा रहेका वा विदेशमा स्वरोजगार रहेका श्रमिकले कम्तीमा आधारभूत पारिश्रमिकको २१ दशमलव ३३ प्रतिशत रकम अर्थात न्यूनतम महिनाको दुई हजार रुपैयाँ कोषमा योगदान गर्न सक्नेछन् ।

सरकारले श्रमिकको आधारभूत पारिश्रमिक महिनाको नौ हजार ३ सय ८५ र महँगी भत्ता महिनाको पाँच हजार ६ सय १५ गरी मासिक न्यूनतम पारिश्रमिक १५ हजार तोकेको छ ।

कोषमा योगदान गर्ने वैदेशिक क्षेत्रमा रहेका श्रमिकले दुर्घटना तथा अशक्तता सुरक्षा योजना, आश्रित परिवार सुरक्षा योजना र अवकाश एवम् वृद्धावस्था सुरक्षा योजनाबाट विभिन्न सुविधा प्राप्त गर्नेछन् ।

 


क्याटेगोरी : राष्ट्रिय, शिक्षा, समाचार

प्रतिक्रिया


धेरै पढिएका

प्रीतिबाट युनिकोड

© Preeti to Unicode
रोमनाइज्ड नेपाली

© Nepali Unicode